KUPAMBANA NA ROHO YA HOFU NA KUISHINDA

KUPAMBANA NA ROHO YA HOFU NA KUISHINDA

na:James F.Mnzava

Bwana Yesu asifiwe sana.Nakukaribisha tena katika mfululizo wa masomo yangu.Leo tena Bwana amenipa nafasi ya kuweza kukushirikisha maneno yake pamoja na mafundisho katika somo la kupambana na roho ya hofu na kuishinda.Karibu sana.

NINI MAANA YA HOFU

Tafsiri rahisi ya neno hofu ni woga,utisho,kutokuridhishwa(uneasiness) au mashaka.Lakini kibiblia neno hofu ni Zaidi ya hisia ni roho(spirit) inayotenda kazi.

2 Timotheo 1:7 7  Basi usiuonee haya ushuhuda wa Bwana wetu, wala usinionee haya mimi mfungwa wake, bali uvumilie mabaya pamoja nami kwa ajili ya Injili, kwa kadiri ya nguvu ya Mungu;

Mwamini anapotumiwa na kuwa chini ya Roho mtakatifu kwa ajili ya kazi maalumu tunaita upako;Upako huu wa Roho mtakatifu unamuwezesha mtu kuwa na moyo na kuwa jasiri katika kila tendo atendalo;Si hivyo tu bali kuwezeshwa huku kwa Roho mtakatifu kunamsaidia pia mtu kuweza kufanya mambo mengine ambayo hapo awali kwa nguvu au kwa hali ya kawaida asingeweza kufanya.

Kutokana na andiko hilo hapo juu tunajifunza kuwepo kwa roho ya hofu kunaweza kuleta au kuathiri mambo ndani yetu;kwa kugeuza kile cha Mungu ndani na kukifanya kuwa hasi ndani. Badala ya upako wa kuwezeshwa na Roho Mtakatifu tunapata upako mwingine wa adui (a negative destructive anointing)

·        Badala ya Roho Mtakatifu kukuwezesha kuwa jasiri,roho ya hofu inakupooza

·        Badala ya kupokea hekima,roho ya hofu inakupa kufanya maamuzi dhaifu.

·        Badala ya upako halisi wa roho Mtakatifu uletao Baraka,roho ya hofu inakupa roho ya laana.

KANUNI ZA KUTAWALA HOFU

Kulingana na Warumi 12:1,2 Kulingana na andiko ilo hapo juu tunaona hapa duniani zipo roho zinazotawala kimfumo katika maisha yetu hapa duniani.Mfumo wa kwanza unatawaliwa na roho ya uzima,na mfumo mwingine unatawaliwa na roho ya mauti.

Pia katika mistari iyo tunaona pia misingi miwili ya kiutawala ambayo kila mkristo anatakiwa kuyatawala.

1)   Moja ni sheria ya uzima katika Kristo Yesu

2)  Pili ni sharia ya dhambi na mauti

Kila mwanadamu anayeishi katika dunia hii ni lazima yupo chini ya mfumo war oho mojawapo hapo.N si vinginevyo.Lakini kitu cha ajabu tunaona japokuwa mtu anaweza kuzaliwa mara ya pili au kuokoka haimaanishi maisha yake yatakuwa kwenye mfumo ulio sahihi.

SHERIA Ni kanuni zilizoanzishwa na zinazotarajiwa kufanya kazi iyo iyo katika nyakati zote.Kwa mfano sheria ya wizi itafanya kazi popote pale haijalishi mwizi ameiba kwa mwenye kuweka iyo sheria au sehemu nyingine bado sheria hubaki palepale.

Hivyo hivyo kadhalika pia katika sheria ya roho izo hapo juu.Kama unaishi chini ya sheria ya roho ya dhambi na mauti huwezi kuepuka matokeo ya dhambi katika sheria yake na mauti pia.

Katika roho hizi zote huwa na matunda yake ambayo mimi huyaita kama matokeo yake endapo utakuwa unaongozwa na uzima au dhambi na mauti.

·        Unapoongozwa na roho ya uzima unapata matokeo ya Amani,furaha,utulivu,ujasiri,hekima maarifa,uhakika wa uzima hata baada ya kufa na mengineyo mengi

·        Unapoongozwa na roho ya dhambi na mauti unapata matokeo ya hofu,mashaka,wizi,tamaa,uasherati,ibada ya sanamu,uchoyo,wivu,hasira na mengine mengi yafananayo na hayo

Ngoja nikupe habari ya kisa kilichowapata wanafunzi wa Yesu ili uzidi kuelewa kitu ninachokiandika hapa

Mathayo 8:25-26  25  Wanafunzi wake wakamwendea, wakamwamsha, wakisema, Bwana, tuokoe, tunaangamia.

26  Akawaambia, Mbona mmekuwa waoga, enyi wa imani haba? Mara akaondoka, akazikemea pepo na bahari; kukawa shwari kuu.

Angalia neno la kwanza ambalo Yesu amelisema hapo KWA NINI MNAOGOPA? Ninyi wa Imani haba.Alilinganisha hofu yao kama watu waliopungukiwa Imani.Luka na Marko wameelezea kwa aina ya tofauti kidogo ambazo zote zinalenga Imani haba waliokua nayo (Luka 8:25,  Marko 4:40)

Katika vitabu vyote hizi Yesu analenga kitu kimoja kikubwa;anauliza kuwa ikowapi Imani yenu? Akilenga kabisa hawa watu wapo chini ya roho ya dhambi na mauti,unapoongozwa na roho hii ni lazima uwe na hofu na kushindwa kufanya maamuzi hasa wakati wa tatizo.

Wanafunzi wa Yesu walikuwa wakipiga kelele kwa hofu ikiashiria walikua na woga,tatizo hapa si ile dhoruba bali roho zilizokuwemo ndani yao ziliwajengea hofu katika tatizo.

KAMA UNA IMANI HUWEZI KUOGOPA,UNAOGOPA KWA SABABU YA IMANI HABA ULIYONAYO

Ngoja nikwambie uwiano huu wa roho pamoja na matunda yake hufanya kazi pamoja na huwa haviachani.Woga ni tunda la roho wa dhambi na mauti na Imani ni tunda la Roho wa uzima,kwa kila tendo huendana na roho yake.

Huu uwiano unaenda ndani sana kuliko unavofikiria kiini cha neno Bwana pale lililenga kiwango cha Imani yao iliyosababisha hofu ndani yao.Ngoja nikuoneshe kitu cha ndani Zaidi karika Imani

Warumi 10:17 16  Basi imani, chanzo chake ni kusikia; na kusikia huja kwa neno la Kristo.

17  Lakini nasema, Je! Wao hawakusikia? Naam, wamesikia, Sauti yao imeenea duniani mwote, Na maneno yao hata miisho ya ulimwengu.

Kumbuka kipaumbele cha Yesu hapa kwa wanafunzi wake kilikua ni kiwango cha Imani ila kwa upande mwingine kipaumbele cha shetani ni kiwango cha hofu uliyonayo.Ni mambo yanayoenda sambamba lakini hayafanani

Kwa mfano Bwana amekupa karama nzuri ya kumuimbia lakini Lakini shetani anakuja na kukwambia na wewe hujui kuimba na kukupa sababu lukuki kwamba huwezi na wewe na baada ya muda unaanza kuipokea ile hali unafadhaika hata ikitokea unahitajika kumwimbia Bwana mbele za watu unaanza kuogopa kwa mawazo kua huwezi na baada ya muda huduma inakufa kabisa.Tatizo hapa si jingine ni shetani kapandikiza roho ya woga.

WOGA UNAMPA SHETANI NAFASI YA KUFANYA KAZI ZAKE NDANI YAKO KWA UHURU WA KUKUTAWALA NA KUKUFANYIA ANACHOTAKA.

Hofu ilifanya mawimbi ya bahari kuingia chomboni na kuwafanya wanafunzi waanze kupiga kelele wasijue wafanye nini;pindi shetani anapoingiza roho ya hofu kwako unanyima uwezo wako wa kufanya maamuzi yaliyo sahihi.

Angalia Yesu alipoamka alianza kuwaambia ikowapi Imani yenu baada ya kuwakuta wanapiga kelele kama watu wasiokuwa na maamuzi ya kufanya,kwa namna nyingine Yesu anawauliza kwa nini hili limetokea?kwa nini maji yameingia chomboni? Kwanini mmeruhusu woga woga wenu katika hili tatizo? Kwa nini msichukue Imani kwa kukemea dhoruba kwa njia ya Imani.

Hakuna njia yeyote ambayo shetani ataingia na kuharibu vitu katika maisha yako pasipo wewe mwenyewe kumfungulia mlango

Unaweza kujiuliza ni kwa namna gani umempa shetani nafasi ya kuongia ndani yako;ni kwa kumpa nafasi ya kuendelea kusikiliza kile anachokwambia pasipo kuyakataa na kuyapuuzia.Unapoendelea kumsikiliza pasipo unaendelea kufungua mlango way eye kuingia ndani na kuleta hofu.

Ngoja nikwambie kitu mambo ya Mungu ni halisi na shetani huyachukua na kuyapindua na kuyafanya yake kama neno la Mungu linasema Imani chanzo chake ni kusikia na kusikia huja kwa neno la Mungu;Vivyo hivyo woga chanzo chake ni kusikia na kusikia huja kwa neno la ibilisi.

Linda milango yako katika nafsi yako masikio yako na machi yako maana ndizo shetani hushughulika nayo sana katika kukupa habari za hofu

VUNJA VIFUNGO VYA HOFU

Tambua kuwa hofu huleta vifungo.Pindi roho ya hofu inapoweka mizizi moyoni mwako unakuwa mtumwa na mfungwa wa hofu.Hii ni kanuni halisi ambayo inaonekana kabisa kwenye kitabu cha Waebrania

Waebrania 2:14-15 14  awaache huru wale ambao kwamba maisha yao yote kwa hofu ya mauti walikuwa katika hali ya utumwa.

15  Maana ni hakika, hatwai asili ya malaika, ila atwaa asili ya mzao wa Ibrahimu.

Hofu ya mauti kama tulivoelezwa hapo juu inamfanya mtu kuwa katika kifungo cha hofu na dhambi,kama ilivyo katika sheria zile za dhambi na mauti .Ila Biblia inatwambia hapo hapo kuwa Kristo alilipa gharama kwa ajili ya kuwakomboa wote wenye roho ya hofu.Yesu alisulibiwa kwa ajili yako kuweza kulipa gharama ya kuwaweka huru wale wote waliofungwa na hofu.

Imani inaleta uhuru,ndio maana shetani anafanya kazi sana ili kuweza kuwafanya wakristo wawe katika woga ili kuwaondoa kwenye Imani.Kwa sisi wakristo kibiblia ni makossa makubwa kuwa katika hali ya hofu 

(Warumi14:23) Biblia inatwambia hatukupokea roho ya hofu;kumbuka kuwa hofu ni kupe katika roho yako anayefyonza kiwango cha Imani yako ili uangamie.

FANYA MAAMUZI YA KUPAMBANA NA HOFU

Bila kufanya maamuzi ya kupambana na roho ya hofu katika maisha yako hutaweza kuishinda hii roho ndani yako,na si tu maamuzi bali maamuzi yaliyoimara.

Mambo yote ambayo shetani hutuletea ni yale yale ya kutukatisha tamaa na kutufanya tujione hatuwezi na kutisha ili tuingie na woga,ila mkristo aliyeokoka na kumfahamu Mungu sawasawa hawezi kutishika na ushawishi huo wa shetani.(Isaya 41:10)

Isaya 43:5 5  Usiogope; maana mimi ni pamoja nawe; nitaleta wazao wako toka mashariki, nitakukusanya toka magharibi;

Maandiko yote hayo yanasisitiza juu ya kitu kimoja ya kuwa tusiwe na hofu kwa maana Bwana yupo pamoja nasi.Unadhani ni kitu gani kilichompa Daudi ujasiri wa kukabiliana na Goliath? Embu tuangalie kile ambacho alikisema

1 Samweli 17:26 26  Daudi akaongea na watu waliosimama karibu, akisema, Je! Atafanyiwaje yeye atakayemwua Mfilisti huyo, na kuwaondolea Israeli aibu hii? Maana Mfilisti huyu asiyetahiriwa ni nani hata awatukane majeshi ya Mungu aliye hai?

Kutahiriwa lilikua ni agano lililowekwa na Mungu kwa Ibrahimu na katika vizazi vyake vyote kitu ambacho Daudi alimjia nacho Goliath na kumwambia wewe mfilisti usiyetahiriwa yaani wewe usiye na agano na Mungu huwezi kunitisha wala kuniogopesha kwani Mungu aliyehai yupo pamoja nami.Haleluyah

Na huo ndio mtazamo ambao Mungu anataka kila mwamini awe nao,haijalishi ni mtu au tatizo la aina gani limesimama mbele yako fanya kama Daudi alivyofanya kwa kumwendea Goliath kwa ujasiri pasipo kujali nguvu alizokuwa nazo.(Zaburi 91:1-2)

·        Kumbuka kufanya maombi hasa ya kupanda mdaraja ya Imani kwa jinsi tulivyotangulia kuona hapo mbele kuwa hofu hushambulia ujasiri wetu na Imani yetu na kutufanya tuingiwe na hofu na mashaka.

·        Hakikisha humpi Shetani nafasi ya kupenyeza maneno ya ushawishi wake katika maisha yako kwani kwa njia hiyo hofu na mashaka hufanya kazi ndani yake.Mfano Ayubu baada ya matatizo na majanga yote kumpata alianza kuingiwa na hofu na mashaka(Ayubu 3:25)

·        Kuwa mtu wa msimamo Kati ya watu ambao shetani huwaogopa sana ni watu wenye msimamo na maamuzi yaliyodhabiti katika kutenda wengi wa watu wenye hofu na mashaka ni watu wasiokuwa na msimamo katika maisha yao

ONDOA ROHO YA HOFU

Hakuna nafasi ya hofu katika maisha ya mtu aliyeokoka.roho ya hofu itakuibia mambo yote yaliyo mazuri na ya maana kwako,itaiba Amani na furaha ndani yako na kuitesa nafsi yako.

Lakini si hivyo tu ila hofu pia hukujengea mazingira ya kuogopa;kama tulivotangulia kuona kuwa kinyume cha Imani ni hofu.Hivyo huna budi kuanza kuchukua hatua.

·        Anza kubadilisha namna unavyosema

·        Acha kuzungumza na kuwaza habari za hofu na mashaka

·        Kemea mawazo ya hofu

·        Anza kutamka Baraka za Mungu pamoja na ahadi zake kwako

·        Anza kuona malaika wa Bwana wamekuzinguka pande zote pindi uwapo katika hali ya hatari.

Kwa kuyafanya hayo taratibu utaanza kuona roho ya hofu inaondoka.Na unapojizoesha kuishi kulingana na kanuni izo utakuwa ni mtu wa Imani na usiyeweza kuyumbishwa na hofu ya aina yeyote.

MUNGU AKUWEZESHE KUSHINDA!!

Imeandaliwa na kuandikwa na;                 JAMES F.MZAVA

Mawasiliano;                                                     0762759621,  0653194411

                              jamesmzava@gmail.com